Landsbankinn er að mestu í eigu íslenska ríkisins, sem fer með 98,2% eignahlut. Landsbankinn er eini bankinn með aðsetur bæði á Höfn í Hornafirði og á Húsavík.
Með netbanka Landsbankans er hægt að fá yfirlit yfir inneign á bankareikningum, sjá og greiða ógreidda reikninga, millifæra á aðra reikninga og sækja um lán eða yfirdráttarheimild. Aðrir bankar bjóða sambærilega þjónustu.
Til að geta notað netbanka Landsbankans, þarf að vera í viðskiptum við Landsbankann og vera með aðgang að netbankanum.

Innskráning
• Hægt er að skrá sig inn á netbankann með því að nota innskráningu með notendanafni og lykilorð.
• Einnig er hægt að skrá sig inn með rafrænum skilríkjum. Þá þarf að slá inn farsímanúmer og smella á hnappinn ,,Auðkenna mig”. Eftir stutta stund opnast staðfestingargluggi í síma. Eftir að hafa yfirfarið að sama öryggisnúmer sé á heimasíðunni og símanum þínum slærð þú inn PIN númerið þitt í símann.
• Á forsíðu má sjá yfirlit yfir bankareikninga og innistæðu, stöðu á kreditkortum og ógreidda reikninga, ef einhverjir eru.
• Ef smellt er á heiti bankareiknings má skoða yfirlit bankareiknings, úttektir (í rauðu) og innborganir (í grænu).
• Undir „aðgerðum“ í yfirliti bankareikninigs má millifæra, greiða inn á kreditkort, sjá PIN númer korta, lesa nánar um bankareikninginn og breyta leyninúmeri reikningsins.

Forsíða heimabankans býður uppá fjölda aðgerða, stikan efst á forsíðu býður uppá eftirfarandi:
• ,,Ógreiddir reikningar” Yfirlit yfir, og möguleiki að greiða, ógreidda reikninga.
• ,,Stöðuyfirlit“ Yfirlit yfir öll þín fjármál hjá Landsbankanum.
• Undir ,,lán” má sjá yfirlit lána viðkomandi og upplýsingar um mismunandi lán í boði.
• Undir „Rafræn skjöl“ má nálgast rafræna launaseðla, reikninga og ýmis önnur skjöl.
• Undir „Lífeyrissparnaður“ má lesa um lögbundinn lífeyrissparnað og viðbótarlífeyrissparnað.

Millifærslur
• Til að millifæra smellir þú á hnappinn “Millifærslur” efst á forsíðunni, þar velur þú hvert skal millifæra.
• ,,Á eigin reikning” Allir reikningar sem þú hefur prókúru á má velja af lista.
• ,,Eftirlætis“ Listi af stjörnumerktum aðilum.
• „Síðustu” Listi af aðilum sem millifært hefur verið á. Þar má einnig sjá litla stjörnu við nöfn einstaklinga, með því að smella á stjörnuna verður hún dökkblá og mun viðkomandi þá birtast á lista undir „Eftirlætis“.
• ,,Nýr viðtakandi” Þá þarf að slá inn kennitölu og bankareikning viðkomandi.
• Mikilvægt er að muna að skrá sig út með því að velja „útskrá“.